कोन थे खाज्या नाईक..?

महागाई, बेरोजगारी आणि वाढत्या गुन्हेगारीविरोधात विदर्भ राज्य आंदोलन समिती आक्रमक

वाढत्या महागाईच्या निषेधार्थ नागपुरात 8 जूनला रस्ता रोको

नागपूर : वाढती महागाई, बेरोजगारी आणि नागपूर शहरातील वाढत्या गुन्हेगारीच्या निषेधार्थ विदर्भ राज्य आंदोलन समितीने सोमवार, 8 जून 2026 रोजी नागपूर येथे रस्ता रोको आंदोलन करण्याची घोषणा केली आहे. हे आंदोलन सकाळी 11.30 वाजता गणेशपेठ बसस्थानकासमोर आयोजित करण्यात आले आहे.

समितीने प्रसिद्ध केलेल्या निवेदनानुसार, केंद्र व राज्य सरकारच्या धोरणांमुळे सर्वसामान्य नागरिकांवरील आर्थिक भार वाढत असून महागाईचा मोठा फटका जनतेला बसत आहे. तसेच नागपूर शहरात वाढत्या गुन्हेगारीच्या घटनांबाबतही समितीने चिंता व्यक्त केली आहे.

महागाई, बेरोजगारी आणि कायदा-सुव्यवस्थेच्या प्रश्नांकडे शासनाचे लक्ष वेधण्यासाठी हे आंदोलन करण्यात येत असल्याचे समितीच्या पदाधिकाऱ्यांनी सांगितले. या आंदोलनात नागपूर शहरातील पदाधिकारी, कार्यकर्ते, विदर्भवादी नागरिक तसेच विविध सामाजिक संघटनांच्या प्रतिनिधींनी मोठ्या संख्येने सहभागी व्हावे, असे आवाहन करण्यात आले आहे.

विदर्भ राज्य आंदोलन समितीचे पूर्व विदर्भ अध्यक्ष अरुण केदार आणि युवा आघाडीचे अध्यक्ष मुकेश मासुरकर यांनी नागरिकांना आंदोलनात सहभागी होण्याचे आवाहन केले आहे. जनतेच्या मूलभूत प्रश्नांवर सरकारने तातडीने उपाययोजना कराव्यात, अशी मागणीही त्यांनी केली.

दरम्यान, रस्ता रोको आंदोलनामुळे गणेशपेठ परिसरातील वाहतुकीवर काही काळ परिणाम होण्याची शक्यता असून, प्रशासनाकडून आवश्यक ती खबरदारी घेण्यात येणार असल्याची माहिती मिळाली आहे.