कोइम्बतूर : पर्यावरण संवर्धन आणि जलस्रोतांची स्वच्छता राखण्याच्या उद्देशाने युवकांच्या नेतृत्वाखाली कार्यरत असलेल्या ‘सपोर्ट विंग्स’ संस्थेने कोइम्बतूर येथील पेरूर तलाव परिसरात स्वच्छता मोहीम राबविली. गणेशोत्सवानंतर तलावात कपडे तसेच विविध प्रकारचा कचरा टाकण्यात आल्याने प्रदूषण कमी करण्याच्या उद्देशाने ही मोहीम आयोजित करण्यात आली होती.
या उपक्रमात सपोर्ट विंग्सच्या स्वयंसेवकांनी ‘कोवाई कुलंगल पाधुकाप्पू’ संस्थेच्या सहकार्याने तलाव परिसरातील कचरा गोळा करून त्याचे वर्गीकरण केले. सपोर्ट विंग्सच्या पाच स्वयंसेवकांनी मोहिमेत सहभाग नोंदविला. या स्वयंसेवकांनी सुमारे २०० किलो कचरा संकलित करण्यास हातभार लावला.
संपूर्ण स्वच्छता मोहिमेदरम्यान तलाव परिसरातून सुमारे दीड टन कचरा गोळा करण्यात आला. त्यामुळे तलाव परिसर स्वच्छ करण्याबरोबरच जलस्रोताचे पर्यावरणीय आरोग्य टिकवून ठेवण्याच्या प्रयत्नांना मदत झाली. कचऱ्याचे योग्य व्यवस्थापन, वर्गीकरण आणि सार्वजनिक जलस्रोतांच्या स्वच्छतेबाबत नागरिकांमध्ये जबाबदारीची भावना निर्माण करणे हा या उपक्रमाचा प्रमुख उद्देश होता.
सपोर्ट विंग्स ही युवकांच्या नेतृत्वाखाली कार्यरत संस्था असून देशातील ८० हून अधिक शहरांमध्ये तिचे कार्य सुरू आहे. नेतृत्व विकास कार्यक्रम, इंटर्नशिप, स्वयंसेवा आणि समाजोपयोगी उपक्रमांच्या माध्यमातून युवकांना सामाजिक बदलासाठी प्रोत्साहित करण्याचे काम संस्था करीत आहे.
या उपक्रमाबाबत सपोर्ट विंग्सचे वरिष्ठ संचालक समर्थ ताओरी यांनी सांगितले की, स्थानिक जलस्रोतांचे संरक्षण आणि जबाबदार कचरा व्यवस्थापनाला चालना देण्याचा या मोहिमेचा उद्देश आहे. परिसर स्वच्छ ठेवण्यासाठी केलेला प्रत्येक प्रयत्न अधिक निरोगी आणि शाश्वत पर्यावरणाच्या दिशेने महत्त्वाचे पाऊल ठरतो.
या स्वच्छता मोहिमेच्या माध्यमातून युवकांना पर्यावरण संरक्षणासाठी प्रत्यक्ष कृती करण्यास प्रोत्साहित करण्याबरोबरच स्वच्छ, निरोगी आणि पर्यावरणपूरक समाजनिर्मितीचा संदेश देण्यात आला.