नागभीड : विदर्भ राज्य आंदोलन समितीचे अध्यक्ष अॅड. वामनराव चटप यांच्या आदेशाने केंद्र सरकारने विदर्भाचे स्वतंत्र राज्य तात्काळ निर्माण करावे, या मागणीसाठी सोमवार, दि. २८ सप्टेंबर २०२६ रोजी नागपूर कराराची होळी आंदोलन करण्यात येणार आहे. नागभीड शहरातील राम मंदिर चौक येथे हे आंदोलन आयोजित करण्यात आले आहे.
विदर्भ राज्य आंदोलन समितीच्या वतीने स्वतंत्र विदर्भ राज्याच्या मागणीसाठी सातत्याने विविध आंदोलनात्मक कार्यक्रम राबविले जात आहेत. त्याचाच एक भाग म्हणून कुचकामी ठरलेल्या नागपूर कराराची होळी करून केंद्र सरकारचे लक्ष स्वतंत्र विदर्भ राज्याच्या मागणीकडे वेधण्यात येणार आहे.
या आंदोलनात विदर्भ राज्य आंदोलन समितीचे नेते माजी मंत्री डॉ. रमेशकुमार गजभे , डॉ. दिलीप शिवणकर, विजय नान्हे यांच्यासह विदर्भ राज्य आंदोलन समितीचे चंद्रपूर, वर्धा व गडचिरोली जिल्हा विभागीय अध्यक्ष (सोशल मीडिया सेल) पराग गुंडेवार तसेच मोठ्या संख्येने विदर्भप्रेमी जनता उपस्थित राहणार आहे.
सोमवार, २८ सप्टेंबर २०२६ रोजी राम मंदिर चौक, नागभीड येथे होणाऱ्या या आंदोलनादरम्यान नागपूर कराराची होळी करून स्वतंत्र विदर्भ राज्याची मागणी करण्यात येणार आहे. आंदोलनाची संबंधित पोलीस प्रशासनाला तहसील प्रशासनाला पूर्वसूचना देण्यात आली आहे.
स्वतंत्र विदर्भ राज्याच्या मागणीसाठी आयोजित करण्यात आलेल्या या आंदोलनाच्या माध्यमातून विदर्भ राज्य आंदोलन समिती पुन्हा एकदा स्वतंत्र विदर्भाचा मुद्दा जनतेसमोर मांडणार आहे.
आंदोलनाची माहिती
📅 दिनांक : सोमवार, २८ सप्टेंबर २०२६
वेळ : साय. ६:०० वाजता
📍 स्थळ : राम मंदिर चौक, नागभीड
🎯 मागणी : स्वतंत्र विदर्भ राज्याची तात्काळ निर्मिती
आयोजक : विदर्भ राज्य आंदोलन समिती