Liquor Ban Row: ‘दारूबंदीमुळे व्यसनमुक्ती होत नाही’; गडचिरोलीतील दारूबंदी हटवण्याची मागणी; हातभट्टीच्या दारूला मान्यता देण्याच्या विधानाने रंगली चर्चा
गडचिरोली | राज्यात विषारी दारूमुळे होणाऱ्या मृत्यूंच्या घटनांनंतर दारूबंदी आणि अवैध मद्यविक्रीचा मुद्दा पुन्हा चर्चेत आला आहे. अशातच सत्ताधारी पक्षातील नेत्यानी गडचिरोली जिल्ह्यातील दारूबंदी हटवण्याची तसेच दुसऱ्या नेत्यानी हातभट्टीच्या दारूला कायदेशीर मान्यता देण्याची मागणी केल्याने राजकीय वर्तुळात नवी चर्चा सुरू झाली आहे.
गडचिरोलीतील दारूबंदीबाबत धर्मराव आत्राम यांची भूमिका
राष्ट्रवादी काँग्रेसचे नेते आमदार धर्मराव बाबा आत्राम यांनी गडचिरोली जिल्ह्यात अनेक वर्षांपासून लागू असलेल्या दारूबंदीचा अपेक्षित परिणाम झालेला नसल्याचा दावा केला आहे. दारूबंदीमुळे अवैध दारूचा व्यवसाय वाढल्याचे सांगत त्यांनी हा निर्णय पुनर्विचार करण्याची गरज व्यक्त केली.
आदिवासी भागातील पारंपरिक संस्कृतीमध्ये मोहफुलापासून तयार होणाऱ्या पेयाला महत्त्वाचे स्थान असल्याचे नमूद करत, त्याला कायदेशीर चौकटीत आणण्याचा विचार व्हावा असेही त्यांनी म्हटले आहे. यासंदर्भात राज्य सरकारकडे पाठपुरावा करण्याची तयारी असल्याचे संकेत त्यांनी दिले.
हातभट्टीच्या दारूवर नियंत्रण ठेवून परवानगी द्यावी : रामदास आठवले
केंद्रीय मंत्री आणि रिपब्लिकन पक्षाचे नेते रामदास आठवले यांनीही हातभट्टीच्या दारूबाबत वेगळी भूमिका मांडली आहे. त्यांच्या मते, अनेक कारवाया करूनही अवैध दारू पूर्णपणे बंद होत नसल्याने शासनाने नियमनबद्ध पद्धतीने या उत्पादनावर नियंत्रण ठेवण्याचा पर्याय विचारात घ्यावा.
अधिकृत व्यवस्थेमुळे दर्जावर नियंत्रण राहील, शासनाला महसूल मिळेल आणि विषारी दारूमुळे होणाऱ्या दुर्घटना कमी होऊ शकतील, असा त्यांचा दावा आहे. मात्र हे त्यांचे वैयक्तिक मत असल्याचेही त्यांनी स्पष्ट केले.
मंत्रिमंडळ विस्तारावरही आत्राम यांचे भाष्य
याचदरम्यान राज्य मंत्रिमंडळात संभाव्य फेरबदलाच्या चर्चांवर बोलताना धर्मराव आत्राम यांनी मंत्रिपदाची इच्छा व्यक्त केली. राज्यातील राजकीय घडामोडी आणि पक्षातील बदलत्या समीकरणांच्या पार्श्वभूमीवर त्यांनी आपली भूमिका मांडली.
विजय वडेट्टीवार यांचे समर्थन
काँग्रेसचे ज्येष्ठ नेते आमदार तथा विरोधी पक्ष नेते विजयी वडेट्टीवार यांनीही या विषयावर प्रतिक्रिया देताना दारूबंदी हा व्यसनमुक्तीचा हमखास उपाय नसल्याचे मत व्यक्त केले. काही राज्यांनी दारूबंदीचा निर्णय मागे घेतल्याचे उदाहरण देत त्यांनी गडचिरोलीतील दारूबंदीबाबत पुनर्विचार करण्याच्या मागणीला समर्थन दिले.
दारूबंदी विरुद्ध नियमन; नव्या चर्चेला सुरुवात
एका बाजूला विषारी दारूमुळे होणारे मृत्यू आणि दुसऱ्या बाजूला अवैध मद्यविक्रीचा वाढता प्रश्न यामुळे दारूबंदीच्या धोरणावर पुन्हा चर्चा सुरू झाली आहे. गडचिरोलीतील दारूबंदी कायम ठेवावी की नियंत्रित आणि कायदेशीर व्यवस्था उभी करावी, यावर राजकीय आणि सामाजिक स्तरावर मतभेद दिसून येत आहेत.