Breaking : चिमूरमध्ये काँग्रेसला मोठा धक्का; वारजुकर कुटुंबाचा सामूहिक राजीनामा, भाजप प्रवेश निश्चित
चंद्रपूर | चिमूर विधानसभा मतदारसंघात मोठी राजकीय उलथापालथ झाली आहे. मुख्यमंत्री देवेंद्र फडणवीस यांची भेट घेतल्यानंतर वारजुकर कुटुंबाने काँग्रेसला सामूहिक राजीनामा दिल्याची अधिकृत माहिती समोर आली आहे.
माजी आमदार डॉ. अविनाश वारजुकर, काँग्रेसचे विधानसभा समन्वयक डॉ. सतीश वारजुकर तसेच शंकरपूरचे सरपंच आणि युवक काँग्रेसचे प्रदेश सरचिटणीस साईश वारजुकर यांनी पक्षाच्या प्राथमिक सदस्यत्वाचा राजीनामा सादर केला आहे. साईश वारजुकर हे स्थानिक स्वराज्य संस्थांमध्ये सक्रिय नेतृत्व म्हणून ओळखले जात असून युवक काँग्रेसमधील महत्त्वाची जबाबदारीही ते सांभाळत होते.
वारजुकर कुटुंब अनेक वर्षांपासून Indian National Congress (काँग्रेस) पक्षाशी निगडित होते. त्यामुळे त्यांच्या एकत्रित राजीनाम्यामुळे चिमूरसह चंद्रपूर जिल्ह्यात काँग्रेसला मोठा राजकीय धक्का बसल्याची चर्चा आहे.
विश्वसनीय सूत्रांच्या माहितीनुसार, वारजुकर कुटुंब लवकरच भारतीय जनता पक्ष (bjp) मध्ये अधिकृत पक्षप्रवेश करणार असल्याचे निश्चित झाले आहे. पक्षप्रवेशाचा कार्यक्रम वरिष्ठ नेत्यांच्या उपस्थितीत पार पडण्याची शक्यता वर्तवली जात आहे.
मुख्यमंत्री भेटीनंतर तात्काळ दिलेला सामूहिक राजीनामा आणि त्यानंतरचा निश्चित झालेला भाजप प्रवेश — या घडामोडींमुळे चिमूर विधानसभा मतदारसंघातील राजकीय समीकरणे बदलण्याची चिन्हे स्पष्ट दिसू लागली आहेत. आगामी निवडणुकांच्या पार्श्वभूमीवर या निर्णयाचे दूरगामी परिणाम होण्याची शक्यता व्यक्त केली जात आहे.