ठाकरे यांची चंद्रपूर जिल्हा काँग्रेस उपाध्यक्षपदी नियुक्ती....संघर्षशील नेतृत्वाला काँग्रेसची संधी
राजुरा | चंद्रपूर जिल्ह्यातील काँग्रेसच्या संघटनात्मक राजकारणात आज एक महत्त्वाचा आणि लक्षवेधी टप्पा गाठला गेला आहे. जय भवानी कामगार संघटनेचे संस्थापक अध्यक्ष तथा कामगार चळवळीतील प्रभावी नेतृत्व सुरज ठाकरे यांची चंद्रपूर जिल्हा काँग्रेस कमिटीच्या जिल्हा उपाध्यक्षपदी नियुक्ती करण्यात आली आहे. ही नियुक्ती माजी आमदार व जिल्हा काँग्रेस कमिटीचे अध्यक्ष सुभाष धोटे यांच्या हस्ते आज (दि. २८) अधिकृतरीत्या जाहीर करण्यात आली.
कामगार, औद्योगिक व ग्रामीण प्रश्नांच्या केंद्रस्थानी असलेल्या चंद्रपूर जिल्ह्यात काँग्रेस संघटन बळकटीकरणासाठी उचललेले हे पाऊल राजकीयदृष्ट्या महत्त्वाचे मानले जात आहे. वेकोलि, वीज प्रकल्प, खासगी उद्योग, खाणकाम आणि शेतीवर अवलंबून असलेल्या मोठ्या लोकसंख्येमुळे कामगारांचे प्रश्न, रोजगार, पर्यावरण, विस्थापन व सामाजिक न्याय हे मुद्दे येथे कायम अग्रक्रमावर राहिले आहेत. अशा पार्श्वभूमीवर कामगार चळवळीतून पुढे आलेल्या सुरज ठाकरे यांचा जिल्हा नेतृत्वात समावेश हा केवळ पक्षांतर्गत निर्णय नसून व्यापक सामाजिक संदेश देणारा निर्णय ठरत आहे.
जय भवानी कामगार संघटनेच्या माध्यमातून सुरज ठाकरे यांनी गेल्या अनेक वर्षांपासून कामगारांचे हक्क, वेतनवाढ, सुरक्षितता, स्थानिक युवकांना रोजगार, तसेच अन्यायकारक धोरणांविरोधात ठाम आणि संघर्षशील भूमिका घेतली आहे. कागदी आंदोलनांपेक्षा प्रत्यक्ष लढ्यांवर भर देत त्यांनी कामगार वर्गात स्वतंत्र विश्वासार्हता निर्माण केली असून औद्योगिक पट्ट्यात त्यांचे नेतृत्व प्रभावी मानले जाते.
या नियुक्तीमुळे चंद्रपूर जिल्हा काँग्रेस कमिटीला जमिनीवर काम करणारे, जनतेशी थेट जोडलेले नेतृत्व मिळाल्याचे चित्र आहे. पक्ष सध्या राज्य व देशपातळीवर संघटनात्मक पुनर्रचनेवर भर देत असताना, ही नियुक्ती त्या धोरणाचा भाग असल्याचे राजकीय वर्तुळात बोलले जात आहे.
नियुक्तीनंतर प्रतिक्रिया देताना सुरज ठाकरे यांनी ही जबाबदारी पद म्हणून नव्हे, तर कार्यकर्ते आणि जनतेशी निष्ठेचे दायित्व म्हणून स्वीकारत असल्याचे स्पष्ट केले. काँग्रेसच्या विचारधारेचा प्रसार, कार्यकर्त्यांचे प्रश्न आणि जनतेच्या हितासाठी प्रत्येक संघर्षात प्रामाणिकपणे उभे राहण्याची ग्वाही त्यांनी दिली.
दरम्यान, जिल्ह्यातील अंतर्गत गटबाजी आणि निवडणूकपूर्व समीकरणांच्या पार्श्वभूमीवर कामगार चळवळीतील नेत्याला जिल्हा उपाध्यक्षपद देणे म्हणजे काँग्रेसला जनआधारित चळवळीशी पुन्हा जोडण्याचा प्रयत्न असल्याचे मानले जात आहे. विशेषतः तरुण कार्यकर्ते, कामगार वर्ग आणि ग्रामीण भागात या नियुक्तीचे स्वागत होत आहे.
माजी आमदार सुभाष धोटे यांच्या अनुभवसंपन्न नेतृत्वाखाली आणि सुरज ठाकरे यांच्या संघर्षशील कार्यपद्धतीच्या समन्वयातून चंद्रपूर जिल्हा काँग्रेस नव्या उर्जेने उभारी घेईल, अशी अपेक्षा व्यक्त केली जात आहे. सध्यातरी, जिल्ह्याच्या राजकारणात सुरज ठाकरे यांची नियुक्ती ही चर्चेचा आणि लक्षवेधी विषय ठरली आहे.